Darr Bohot Zaruri Hota Hai.
Baap ka ho ya apne liye kiye hue paap ka, darr toh darr hota hai.
Lekin kuch darr aise bhi hote hain jo tumhe sirf raat ke andhere mein darate hain. Hum unhe kalpanik darr kahte hain.
Esa hi ek darr mein jee rahi thi ek ladki, Rahil.
Rahil ek aisi ladki thi jisne chhoti si umar mein ek aisi ghatna dekhi thi jo ek bade se bada insaan dekhe toh uski rooh tak kanp uthe.
Rahil ke bachpan ka woh shaam:
Rahil sirf 6 saal ki thi. Ek shaam wo apne doston ke saath chhupan-chhupai khelte-khelte gayab ho gayi.
Doston ne socha, “Shayad wo ghar chali gayi hogi,” aur andhera hote hi sab apne ghar chale gaye.
Par ghar pahunchkar pata chala ki Rahil wahan nahi thi.
Uske gharwalon ne har jagah dhundha, lekin Rahil ka koi pata nahi chala. Ek hafta beet gaya,
Par uske gharwale ab bhi har jagah use dhoondh rahe the, unhone ummeed nahi chhodi thi.
Fir ek din…
Ek din subah, gaon ke paas wale kue se ek ajeeb si chillane ki awaaz sunayi di.
Awaaz darawani thi, jaise koi zindagi ki bheekh maang raha ho.
Kue ke paas ke charwaho ne jab wo awaaz suni, toh woh bhagte hue kue ke paas aaye. Itni darawani aur bhayanak awaaz sun ke wo bhi dar gaye. Dheere dheere gaon ke log jama hone lage.
Har koi dar ke kue mein jhank raha tha. Neeche sirf andhera tha aur chillane ki awaaz aa rahi thi.
Gaon ke kuch logon ne kue mein jaane ka faisla kiya. Jab wo kue ke andar gaye, toh awaaz achanak band ho gayi.
Bahar sab un logon ke liye dua kar rahe the ki unhe kuch na ho. Thodi der baad kue ki rassi hilne lagi.
Gaon walo ne rassi kheenchna shuru kiya aur dekha ki Rahil us rassi se kamar par bandhi hui latak rahi thi.
kue me se 4 log bahar Aa chuke the. ek admi ko abhi bhi nikalne ki taiyyari chal rahi thi.
Rahil ki saansein chal rahi thi, lekin uska sharir bilkul sukh gaya tha. Uski twacha pe kale-kale daag the, aur uski halat dekh kar sabki raaton ki neend udd gayi.
Doctors usse turant hospital le gaye, lekin Rahil hosho-hawaas mein nahi thi.
Doctors samajh nahi paa rahe the ki uske saath kya hua hai.
Wo zinda thi, lekin jaise uski atma use chhod kar ja chuki thi.
Doctors ne 2 din tak lagatar koshish ki, par uski aankhein nahi khul rahi thi. Rahil jaise ek ajeeb si neend mein thi jo maut aur zindagi ke beech latakti hui lag rahi thi.
- Rahil ke saath kya hua hoga?
- Wo kue mein kaise gayi hogi?
- Ek hafte tak bina khaye piye wo kaise zinda rahi hogi?
- Aur uske sharir pe kale daag kyun hue honge?
Is raaz ka pata lagane ke liye, Episode 2 zarur padhein.
Echo Dream Ep-01